شرفنا اكثر من مرة الشاعر الكبير فريد طه ( وهو من قاطني مدينة 6 اكتوبر ) أكثر من مرة وأمتعنا بشعره الرائع ومنها هذه القصيدة
خليني أحس إني راجل
الشاعر الكبير فريد طه
يا ولية إهتمي حبة بمظهرك في البيت
وغيري الجلابية اللي هراها الزيت
والعصبة فكيها انا .. من شكلها مليت
طول النهار في الغسيل والطبيخ والتنفيض
راح فين جمالك زمان اللي ملان تحريض
عجبك كذا منظرك بتخوفي العفاريت
*****
حسي بمشاعري يا هانم .. واعرفى لك جوز
مش كل حبة التقيكى ضربة لك ميت بوز
وإن قلت فيه إيه ؟ .. دموعك تملا عشرين كوز
خليتي عشتى ما بين الآه وتنهيده
وكأنى واخذ فى عيشة الغم تأبيده
ما تكنش د خطة سابقة لانتحارى ؟ يجوز
*****
مش شايفة جارتك سماسم كلها شياكه
وشعرها ديل حصان وف آخره مساكه
وواقفه زى الغزال والشفه ضحاكه
وجوزها عمال يغازل فيها .. كله نشاط
ابص اشوفه التقينى .. عقلى شت وشاط
مت هى ست زيك .. لكن مش عامله سباكه
*****
أنا نفسى اشوف فى عينك أجمل الستات
ولابسه ومتزوقه .. ولا أجمل الجميلات
خلينى أحس إنى راجل لسه لسه له شنبات
يبص لك ينتشى .. ويقول صلاة الزين
والحب يرجع صبى .. نفضل معاه حبيبين
ونعيش فى بيت فيه هنا كله تبات ونبات